Bannað eiturevni í fýra av seks klædnapløggum

Mikudagur 24. august 2011 - 07:58

Umhvørvisfelagsskapurin Greenpeace hevur júst almannakunngjørt úrslitið av eini kanning, sum felagsskapurin hevur gjørt av klædnapløggum frá fimtan navnfromum klædnamerkjum.

Kanningin avdúkaði evnið nonylphenolethoxylat í fýra av hvørjum seks pløggum, sum kannað vórðu. Av tí at evnið verður hildið at vera hormonórógvandi og torført at bróta niður, er bannað at brúka tað í klædnaframleiðslu í ES.

H&M hevur boðað frá, at ketan ikki loyvir evninum í síni framleiðslu; men Patrik Eriksson, átaksleiðari í Greenpeace, sigur kanningina staðfesta, at klædnaketurnar ikki hava tamarhald á, hvørji eiturevni verða brúkt í framleiðsluni.

Tey fimtan merkini, sum vóru umboðað í kanningini, eru Abercombie & Fitch, Adidas, Calvin Klein, Converse, GAP, G-Star Raw, H&M, Kappa, Lacoste, Li Ning, Nike, Puma, Ralph Lauren, Uniqlo og Young.

Kelda: fashionforum.dk

Elin Christiansen
skriva til .(JavaScript má vera gildað fyri at kunna síggja teldupostadressun)

Les eisini